الفيديو ده جالي فكرته لما كنت بجهز لتعلم الألماني، ونزلت بوست في جروب بسأل عن مصادر…
اتصدمت إن أغلب الكومنتات كانت بتسألني:
“إزاي اتعلمت إنجليزي أصلاً؟”
ناس كتير مهتمة تتعلم لغة تساعدهم يلاقوا شغل، يسافروا، أو حتى يطوروا نفسهم.
علشان كده عملت الفيديو ده عشان أشرح تجربتي خطوة بخطوة.
مين أنا؟ وليه تسمعلي؟
أنا عبدالله أسامة، بدأت حياتي العملية كعامل، ومرتبي كان 2000 جنيه.
مكانش عندي رفاهية أخد كورسات مدفوعة.
تعلمت إنجليزي ذاتي بعد شيفت الشغل… واشتغلت بعد كده في بنك أمريكي كـ Call Center Agent.
تعاملت مع مئات العملاء الأمريكان، وساعدتهم في مشاكلهم البنكية.
اللغة كانت سبب رئيسي إن حياتي تتغير… حرفيًا.
ليه تتعلم إنجليزي؟
– كل الانترفيوهات دلوقتي بالإنجليزي
– أي شغل بالعربي، لو عملته بالإنجليزي، هتاخد عليه فلوس أكتر
– اللغة بتفتحلك فرص سفر
– تقدر تتعلم مجالات زي الماركتنج أو البرمجة من جامعات عالمية ببلاش
– التواصل مع ناس من دول تانية هيغير طريقتك في التفكير
أهم حاجة: لاقي الحافز بتاعك
الحافز هو اللي هيخليك تكمل حتى لو مش شايف نتيجة سريعة
بالنسبة لي؟
كنت عايز أخرج من دايرة الشغل الروتيني والمرتب القليل.
وكان لازم أبدأ باللغة.
المصادر اللي ساعدتني 👇
للمبتدئين:
– قناة إبراهيم عادل – تعلم من الصفر
– اقرأ قصص أطفال أو كتب بلغة بسيطة زي The One Thing
للمستوى المتوسط:
– AJ Hoge – مهم جدًا تردد وراه بصوت عالي
– ابلكيشن Busuu – بعد كل درس، اكتشف كلمات جديدة وراجعها
عشان تحسّن مهارة التحدث:
– احكي عن يومك بالإنجليزي في فويس نوت
– كلم نفسك كل يوم (زي ما إبراهيم عادل قال)
– شوف أفلام بترجمة إنجليزي وسجّل أي idioms جديدة
– اسأل ChatGPT عن معاني أو استخدام الكلمات الجديدة
أهم نصيحة: اتكلم من أول يوم
متستناش تكون “جاهز”، اتكلم من أول ما تتعلم كلمتين
كل يوم احكي عن يومك
سجل لنفسك
وشوف الفرق بعد أسبوعين بس
أول ما توصل لمستوى تقدر تتكلم فيه عن نفسك…
قدّم على شغل!
وده هيفرق في مستواك بطريقة مش طبيعية
الشغل هو أكتر حاجة بتحطك في موقف حقيقي يخليك تتعلم وتتطور
فكرة الكورس الجاي
في آخر الفيديو قلت إني بفكر أعمل فيديو شامل عن إزاي تلاقي شغل في الكول سنتر، تتقبل في الإنترفيو، وتنجح بعد ما تتعين
لو مهتم، اكتبلي في الكومنت: شغل كول سنتر
ولو لقيت ناس كتير مهتمة، هبدأ أجهز للفيديو ده أو حتى كورس بسيط.
📺 شوف الفيديو على يوتيوب: اضغط هنا
📣 انضم لجروب الفيسبوك للنقاش والأسئلة: اضغط هنا
🌐 زور موقعي: abdallahusama.com
🗣️ وابدأ اتعلم النهاردة… كل اللي محتاجه هو حافز قوي، وإنترنت.
